نتمنى تأجيل دوام الجامعة لبعد العيد وقبول الشيخ نهيان لرسالة اتحاد الطلبة 2024.

نتمــــــــــــنى تأجيل الدراسة لبعد العيد لهالأسباب:
1- دواااام المدارس تأجل بنظرة ثاقبة من سمو الشيخ محمد بن راشد ومعالي الوزير حميد القطامي.. وأكيد ما أجلوه إلا لأسباب مقنعة وقوية .. وأسباب تنطبق على طلاب الجامعة بعد..

2- أغلب العوايل عندها عيال ف المدارس + الجامعة.. بتستوي الاجازة أبد مب مرتبة إذا كل حد من عيالهم إجازته غيير.. الحين التغيير بيصير ف العشر الأواخر من رمضان.. اللي كانو يبون يعتمرون مثلا أو يكونون مع الأهل.. يمكن ما يقدرون ينظمون هالشي لأن حد من عيالهم مأجز وحد مداوم! والاختلاف في هالأسابيع بتسبب بعد اختلاف في إجازة نص السنة.. ويا حلات سفر إجازة الربيع.. كيف بتقدر العايله تسافر كلها؟!!

3- إذا كان من أكبر عوائق التأجيل هو الدكاترة الأجانب.. أنا متأكدة انهم يفضلون دوام كامل بعد العيد بدل الدوام القصير أثناء رمضان.. أصلا ً شي دكتور أجنبي قال لنا جملة بالانجليزي بمعنى: "أدري انكم مب فاهمين شي من كلامي لأنكم صايمين وما شربتو كوفي ع الصبح! " مافيه دكتور يرضى انه يشرح ويشرح مع إن استيعاب الطلاب مب ذاك الزود.. خاااصة في المساقات الصعبة في الكليات الصعبة.. وهالأسابيع بتنحسب من السمستر يعني لازم يخلص كمية من المنهج لكن لا الطلاب و لا قصر الدوام يشجعون على هالشي.. هذا بالنسبة للدكتور الأجنبي.. أما الدكتور العربي زايد عليه بإنه هو بعد صايم ومجهوده وأداءه في رمضان أقل من أداءه في الشهور الثانية..

4- أداءنا نحن الطلاب أقل بطبيعة حال الصوم.. فهالأسابيع ما بننجز.. مع إنه مطلوب منا نخلص منهج 3 أسابيع.. بنعوضها بعدين وبيتراكم الضغط علينا بعد رمضان..

5- اللي يقول إن الدراسة عبادة هييه نعم كلامه صح.. لكنها عااائق كبيييير لعبادات ثانية أسااااسية في رمضان مثل القرآن والقيام.. صدقوني اللي يدرس في كلية صعبة ماااا يحصل فرصة ولا وقت لأي شي.. خاصة إن دكاترتنا ما يراعون وما شا الله يبدون من أول يوم دراسي في أول أسبوع لأنهم لازم يمشون ع خطة المساق صح.. حلوو إنا نتفرغ في رمضان في العشر الأواخر للعبادة بدون هم الدراسة.. أما اللي يقولون انه بالعكس بيصير سهر ع التلفزيون بدل الدوام ف أنا أقول لهم كلن يرى الناس بعين طبعه.. مب كل الناس يسوون جيي في أعظم شهر..

6- الجو حااااار.. والدوام مع الصوم عذاب خاصة للناس اللي جداولهم مب مرتبة وفيها بريكات.. المدارس أجلت مع إن دوامها من 8 لـ 2 بس.. نحن ف الجامعة ممكن يكون دوامنا من 8 لـ 6 ! وشي طلاب وايدين دوامهم في مباني مختلفة بين المعهد الاسلامي والجيمي وفلج هزاع … وإلخ من الأماكن المتباعدة.. أما البنات مباني متباعدة نسير لها مشي تحت هالحر ومع العطش بعد!

7- طلاب وطالبات السكن.. أكييييد يتمنون قضاء هالشهر الفضيل بأجواءه مع الأهل.. اللي يعارض هالنقطة ما يعرف شو يعني رمضان في السكن! أنا مب من بنات السكن لكن تفكيري مب أناني.. أفكر بحالهم وأحس بصعوبة الوضع إذا كان بعيد عن الأهل..

8- التقويم الجامعي مب دستور! ما فيها شي لو تغير حسب ظروف الطلاب وحسب ظروف الدولة اللي وزارة التربيه فيها أجلت الدوام.. وأغلب الدول الشقيقة ما بتداوم في رمضان.. لييش يظلون طلاب جامعة الامارات هم الفئة المكروفة عشان خاطر التقويم الجامعي الثابت!

اللي كتبته جزء من الاسباب.. واخواني الطلاب والطالبات كتبو بعد أسباااب وأسباااب..
نتمنى من معالي الشيخ نهيان بن مبارك آل نهيان إنه يسعدنا بالموافقة على رسالة اتحاد طلبة الامارات اللي فيها راي 90% من طلاب وطالبات الجامعة..
نتمنــى.. كلنا أمل كبـــير إن سمو الشيخ ما بيردنا..