يروح وزير مع وعوده اللي ما تنفذت ويحل محله وزير مع وعوده الجديده …وكل مرة نامل خير ..
اللي يوعدنا بزيادة الرواتب واللي يوعدنا بتغيير طريقة التعليم في المدارس واعداد جيل واع يواكب العصر ما اختلفنا عليه..وهذا شي الكل يمناه..
وعدونا بزيادة الرواتب (
) وكل مرة يكون له وقت مرة بداية العام الجديد ومرة في آخر العام ومرة في بداية السنة الجديدة ..ليما تعودنا وصرنا ما نصدق..وما راح نصدق حتى لو شفنا الزيادة في الرواتب 
هذا مب القصد من الموضوع ..
في شي وعدونا فيه ألا وهو "رفع قيمة المعلم في المجتمع" <<<هذا المطلوب
شو فايدة الزيادة وتطوير التعليم من غير الاحترام سواء من اولياء الأمور أو من ادارة المدرسة نفسها
بقولون شو اللي خلاني أكتب هالموضوع ..؟!!!!
من حقكم تساءلون ..مدرسة في احدى المدارس الشرقية مطلعه نشرة للمدرسات من بينها اقتراحات …
تطالب فيها انهم يقترحون افكار يعاقبون فيها المعلم (معلمات المدرسة)
وهل يعاقب المعلم؟!!!!
غير عن الاسلوب اللي يلاقونا فيه أولياء الامور وكانا عفوا (بشاكير ) عندهم
يعنى اذا الطاقم الاداري أهان المعلم ..فما بالكم بالبقية ما نلومهم
يا جماعة ما نبغي زيادة في الرواتب …
بس
نطالب برفع قيمتنا في المجتمع ..والله حرام احنا وايد نتعب في شغلنا ومحتسبين الاجر عند المولى ..بس نبغي أحد يحسسنا يقيمتنا مثل :الطبيب والمهندس ..احنا ادوارنا لا تقل عنهم أهمية
مع إني أحب شغلي لكني أتمنى احصل وظيفة ثانية ..تعطيني مثل ما انا اعطيها…
والسموحة بس هذا فيض من غيض والخافي اعلم